بدأت اشك ان بيحطلي حاجه في الشاي
- بقى كده يا مريم؟ عرفتِ كل حاجة؟ طب والله ما أنتِ طالعة من هنا حية.. أنتِ وأختك!
سارة حاولت تضربه بكرسي، بس زقها طيرها في الحيطة.
نفسي كان بيموت، وعيني بدأت تزغلل، وإيده كانت زي الحديد على زوري.
وفجأة…
“بوم!”
باب الشقة اتقلع من مكانه!
جرجس والقوات اقتحموا المكان بالأسلحة:
- إثبت مكانك يا مينا! ارفع إيدك فوق بدل ما أفرغ الخزنة في دماغك!!
مينا ساب رقبتي وفضل يبص حواليه بجنون. مسك السكينة من على السفيرة وحاول ياخدني رهينة، بس جرجس كان أسرع.. ضربه بالنار في رجله!
مينا صرخ وسقط على الأرض وهو بيملس على رجله اللي بتنزل دم.
العساكر جم وجتفوه بالحديد في ثواني.
جرجس قرب مني، وأنا كنت باخد نفسي بالعافية على الأرض وسارة حضناني وبتبكي.
- إنتِ كويسة يا مريم؟ هزيت راسي وأنا مش قادرة أتكلم.
جرجس مسك تليفون مينا اللي كان واقع على الأرض، والتليفون كان لسه مفتوح على الشات.
جرجس بص للشاشة وقال للظابط اللي معاه:
- حرز التليفون ده فوراً! “الدكتور” بيكلمه دلوقتي وبيسأله العينات جاهزة ولا لأ… تتبعوا الرقم ده بسرعة، هتوصلوا لمقر الشبكة قبل ما يحسوا بأي حاجة!
بعد ست شهور من الليلة المرعبة دي…
كنت قاعدة في جنينة بيتنا القديم، ومسكة كوباية شاي بجد.. شاي عملته بإيدي أنا.
التحقيقات كشفت بلاوي.
مينا ما كانش مجرد مندوب مبيعات، ده كان جزء من شبكة دولية لبيع البيانات الطبية والعينات الجينية للضحايا على المظلم (Dark Web)، وكان بياخد مبالغ ضخمة مقابل العينات دي وفيديوهات التخدير.
الشرطة قبضت على “الدكتور” اللي طلع طبيب تحاليل مشهور، وقفلوا الوكر بتاعهم بالكامل.
ومينا أخد حكم بالسجن المشدد 25 سنة، مع إمكانية زيادة العقوبة بعد فتح قضايا الاختفاء القديمة للبنات اللي ظهرت أسماءهم في الأجندة.
سارة اختي كانت قاعدة جنبي، مسكت إيدي وابتسمت:
- بتفكري في إيه يا مريم؟ بصيت للسما والتنهيدة طويلة خرجت من صدري:
- بَفكر في إن ربنا نجدني يا سارة… بفتكر الليلة اللي قررت فيها أدلق الشاي في الحوض وأعمل نفسي نايمة… الليلة دي هي اللي كشفت الشيطان، وهي اللي كتبتلي عمر جديد.
سارة حضنتني وقالت:
- المهم إن الكابوس ده خلص يا حبيبتي.. والحمد لله إنك وثقتِ في إحساسك وما سكتيش.
ابتسمت ورشفت من الشاي الدافي… وأول مرة من سنة كاملة، أحس إن قلبي مطمن، وإن الكابوس اللي عشته تحت سقف بيتي انتهى للأبد.
تمت. مشـــيره محمـــــــد
