بدأت اشك ان بيحطلي حاجه في الشاي
- مريم.. صباح الخير يا حبيبتي. قمتِ أهو؟ نوم الهنا، شكل الشاي بالنعناع أثر معاكي وخلاكي تنامي مرتاحة. بصيت له وحاولت أجمع كل طاقة التمثيل اللي في العالم، ابتسمت بتعب وقلت له:
- صباح النور يا مينا.. اه والله، تقريباً كنت محتاجة النوم ده أوي. حاسة إني كنت غايبة عن الدنيا. قرب ومسك إيدي:
- طب الحمد لله يا قلبي. أنا نازل بقى عشان عندي اجتماع مهم في الشركة، وممكن أطلع منه على السفر لإسكندرية، مش هرجع غير بكرة بالليل.مشـــيره محمـــــــد
أول ما قال “مش هرجع غير بكرة بالليل”، قلبي دق بلهفة. دي الفرصة الوحيدة اللي قدامي عشان أفهم المصيبة دي.
- ترجع بالسلامة يا حبيبي.. خلي بالك من نفسك.
أول ما باب الشقة اتقفل وصوت عربيتو بعد من الشارع، اتنفست بصوت عالي. قمت جري على أوضة النوم. نزلت على ركبي وجبت الشنطة السودة من تحت السرير.
إيدي كانت بملفف وأنا بفتح السوستة. الشنطة كان فيها حاجات تجنن:
- كاميرا ديجيتال صغيرة جداً.
- علبة فيها أكياس بلاستيك متقفلة، كل كيس فيه حتة قماش معينة معزولة، ومكتوب عليها تاريخ واسم!
- العينات.. زجاجات صغيرة فيها دماء ومكتوب عليها رموز.
- الأجندة السودة.
مسكت الأجندة وايدي بترتعش. فتحت أول صفحة.
الأسماء كانت مكتوبة بالترتيب، وكل اسم جنبه تاريخ، ونوع قماش، وتحليلات طبية:
- سارة ن. – 2022 (قصاصة من فستان دانتيل أسود – عينة دم – فصيلة A+)
- كريستين م. – 2023 (قصاصة من بيجامة حرير زرقا – عينة دم – فصيلة O-)
- مريم ج. – 2025 (قصاصة من بيجامة قطن – عينة دم – فصيلة B+)
وقفت عند اسمي.. ورجعت لورا. الأسماء اللي قبل اسمي! سارة؟ كريستين؟
مين دول؟!
فجأة افتكرت.. سارة دي كانت خطيبته الأولى اللي فركش معاها فجأة من تلات سنين وقال إنها سابته عشان مسافرة! وكريستين كانت زميلته في الشغل اللي اتوفت فجأة من سنتين وقالوا وقتها إن جالتها هبوط حاد في الدوره الدموية وهي نايمة!
يعني مينا كان بيمارس نفس اللعبة دي مع كل واحدة يدخل معاها في علاقة!
فتحت الصفحات الأخيرة في الأجندة.. كان فيه شات متفرغ ومكتوب بخط إيده، كان بيكتب التعليمات اللي بياخدها من التليفون:
“العميل رقم 4 طالب عينات دم طازة من فصائل نادرة مع توثيق للضحية وهي تحت تأثير مخدر (الزولبيديم). لازم القصاصة تكون من هدوم كانت لابساها وهي نايمة عشان إثبات الملكية.”
صرخت بصوت مكتوم وحطيت إيدي على بوقي.
شبكة! مينا شغّال مع شبكة عالمية أو موقع مظلم (Dark Web) بيبعثوا عينات ونشاطات مرعبة لناس أثرياء ومرضى نفسيين بيشتروا التفاصيل دي بمبالغ خيالية!
مسكت تليفوني فوراً. كنت محتاجة حد أثق فيه. حد يقف جنبي قبل ما أتدمر. اتصلت بـ “جرجس”، ابن عمي، وهو ظابط شرطة في البحث الجنائي وتربينا سوا.
