غاليه

بتاخدي حاجة إكده ولا إكده تمنع الخلفة وإحنا منعرفش؟
الكلمة نزلت على شيرين زي المية الساقعة، وشها جاب ألوان، وبصت لغالية بخوف حاولت تداريه
شيرين بصوت مهزوز حاجة إيه اللي هاخدها؟ دي إرادة ربنا يا مدام غالية. وكل شيء بأوانه.
مازن بشك وبصوت خشن غالية معاها حج يا شيرين. السنتين فاتوا وإنتي كل ما أجيبلك سيرة الخلفة بتتحججي. إنتي مخبية عني حاجة؟
شيرين بعصبية وارتباك إنت هتصدق التخاريف دي يا مازن؟ أنا هقوم أطلع أوضتي أحسن، القعدة بقت تخنق.
قامت شيرين بسرعة وطلعت على السلم وهي بتخبط برجلها.
مازن فضل قاعد بيبص لغالية اللي كانت بتشرب الشاي بهدوء قاتل وكأنها مقالتش حاجة. الشك دخل قلبه وبدأ ياكل في دماغه.
بعد العصر في جنينة الدوار
غالية كانت بتسقي الورد لوحدها. مازن شافها من شباك المندرة، مقدرش يمسك نفسه، طلع وراح وقف وراها. ريحة عطرها اللي كان بيجاهله سنين بقت دلوقتي بتخنقه من كتر ما هي حلوة.
مازن بصوت واطي إنتي جصدك إيه بالحديت اللي جولتيه لشيرين جوة ده؟
غالية لفت ببطء، وبصتله بعيون بريئة
غالية حديت إيه يا مازن؟ أنا بدعيلكم بالذرية الصالحة، هو ده عيب؟
مازن قرب خطوة، عينيه كانت بتفحص ملامحها، شايف فيها قوة وثقة عمره ما شافهم في غالية القديمة المكسورة. حس إنه كان أعمى، إزاي رمى الجوهرة دي لأخوه؟
مازن بصوت مخنوق بالغيرة والندم غالية.. إنتي اتغيرتي جَوي. بقيتي واحدة تانية.. واحدة بتشدني ليها غصب عني. كل ما أشوفك بتضحكي لجابر بحس إن روحي بتنسحب مني.
غالية رفعت حاجبها وابتسمت بسخرية
غالية طبيعي أتغير يا وِلد عمي. اللي يلاجي راجل يصونه ويشيله فوق راسه كيف ما جابر عامل معايا، لازم يتغير ويحلو. جابر ردلي روحي اللي اتسحبت مني جبل إكده.
مازن فقد السيطرة على نفسه، مسك دراعها بقوة وقربها منه بغضب وعيونه حمرا
مازن إنتي ليا أنا يا غالية! جابر ده كوبري الشهر ده وبس! أنا مش هسيبك ليه.. أنا هطلج شيرين أول ما الشهر يخلص وأستلم الورث، وهرجعك ليا، إنتي فاهمة؟ مش هتبجي لراجل غيري!
غالية بصت في عينيه بقرف وتحدي، ولسه هتفتح بوقها عشان ترد عليه وتهزقه، قاطعهم صوت صرخة خلتهم الاتنين يتجمدوا مكانهم
بتجول إيه يا مااازن؟!
لفوا الاتنين ببطء ناحية الصوت…
في جنينة الدوار لحظة المواجهة
شيرين كانت واقفة على باب الجنينة، ملامحها مصدومة وعينيها بتطق شرار، مش مصدقة الودن اللي سمعت جوزها وهو بيبيعها في ثانية عشان يرجع لمرات أخوه!
شيرين بصوت عالي بيترعش من الغضب بتجول إيه يا مااازن؟! عايز تطلقني بعد ما ضيعت عمري معاك واستحملت العيشة في الصعيد عشان ترجع لمرات أخوك؟ بتخوني وعايز ترميني؟
مازن اتخض وساب دراع غالية بسرعة، ووشه جاب ألوان. حاول يداري ارتباكه ويلم الموقف.
مازن بتلعثم شيرين! إنتي.. إنتي فهمتي غلط، أنا كنت بجولها…
غالية نفضت إيدها من مكان مسكة مازن باحتقار، وبصتله بقرف، وبعدين لفت لشيرين ورفعت راسها بكبرياء وثبات.
غالية فهمت غلط إيه يا وِلد عمي؟ جولها الحج.. جولها إنك عتجري ورايا كيف الخيال وأنا اللي بصدك. لمي جوزك
يا شيرين وعجّليه، أنا ست متجوزة ورايدة راجلي، وجوزك لو جرب مني خطوة كمان، أنا هخلي جابر يكسرله رجله اللي خطت ناحيتي. لمي جوزك جبل ما جابر يلمه!
سابتهم غالية واقفين ياكلوا في بعض، ومشت بخطوات واثقة لداخل الدوار، وسابت وراها نار قايدة مستحيل تنطفي.
مازن بعصبية وهو بيقرب من شيرين إنتي إيه اللي نزلك الجنينة دلوك؟ صوتك ميعلاش في الدار، إحنا مش في الشارع!
شيرين بزعيق ودموع تماسيح أنا اللي صوتي ميعلاش؟ ده أنا هفضحك في البلد كلها! طلقني يا مازن.. طلقني وهاتلي حقي وورثي اللي وعدتني بيه، أنا مش هقعدلك فيها دقيقة واحدة!
لفت شيرين