الطوارئ مشيره محمد

روايات_مشيره_محمد الدكتور مسك الموبايل المكسور بين إيديه وقعد يقلب فيه بثواني معدودة وشه اتحول فيها من الهدوء للجمود التام. الممرضة اللي كانت واقفة جنبه رفعت حاجبها وهي بتشوف ملامح الدكتور بتتغير، وجمود مفاجئ سيطر على المكان كله، كأن الهواء نفسه اتقطع من الأوضة. محمود كان واقف عند الباب، لابس قميصه الأرزق المقلم اللي بيلبسه لما يكون رايح مشوار مهم، وشعره متسرح بانتظام كأنه نازل اجتماعات شركة مش نازل يجري ورا بنته المغمي عليها في المستشفى الساعة أربعة الصبح. رسم ابتسامة هادية على وشه، الابتسامة دي بالذات اللي كنت بشوفها لما نكون وسط الناس والكل يقولي "يا بختك بمحمود، راجل رزين ومحترم". محمود قرب خطوة، وصوته نزل لطبقة هادية وواثقة وقال: "مساء الخير يا دكتور.. أنا محمود، والد مريم. معلش، المدام متوترة شوية وبتهول الأمور كالعادة، ومريم بنتي صغيرة وبتخاف من أطقم المستشفيات، فتلاقيها بتقول أي كلام من الخوف.. بعد إذنك أنا هاخد بنتي وأروح بيها لدكتورنا الخاص". الدكتور حط الموبايل في جيبه بكل ثبات، وبص لمحمود بصلة طفّت الابتسامة المزيفة من على وشه في ثانية. الدكتور قال ببرود يرعب: "أستاذ محمود، بنتك حالياً في حالة طبية حارجة، محتاجة عملية استئصال زايدة فورية لأنها على وشك الانف؟؟؟؟جار، ده غير إن التقرير الطبي اللي بيتسجل دلوقتي فيه شق جنائي واضح.. حضرتِك مش هتحرك خطوة واحدة برة الأوضة دي إلا مع أمن المس؟تشفى". محمود وشه اتخطف، والدم هرب من خدوده: "شق جنائي إيه يا دكتور؟ أنت فاهم أنت بتقول إيه؟ أنا مهندس معروف وماسمحلكش تتكلم معايا بالطريقة دي! أنت عارف أنا ممكن أعمل إيه في المستشفى دي؟ ".في اللحظة دي، مريم صرخت من على السرير، صوتها كان طالع بالعافية، مبحوح ومكسور، بس هز جدران الأوضة: "يا دكتور افتح الملاحظات الصويتية اللي في الموبايل! افتح تسجيل يوم الجمعة اللي فات! هو اللي ضربني في بطني بالبونية لما رفضت أدي له فلوس حصالتي عشان يسدد ديون المراهنات بتاعته! وهو اللي كان بيكتم نفسي بالمخدة لما أصرخ ويقولي لو نطقتي بحرف لأمك هرميكي من البلكونة!". الأرض دارت بيا. الكلمات كانت بتنزل على دماغي زي المطارق. مراهنات؟ ضرب؟ كتم نفس؟ بصيت لمحمود وأنا مش مصدقة.. الراجل اللي عشت معاه تلاتاشر سنة، الراجل اللي كنت بفتكر إنه مجرد شخص عصبي أو دقيق بزيادة، طلع بيمارس إرهاب منظم على بنتي في غيابي؟ محمود اتقلب وشه في ثانية للوش الحقيقي اللي كنت بشوفه بين أربع حيطان.. الوش المرعب.. عينيه احمرت وهجم ناحية السرير وهو بيزعق: "يا بنت الـ... أنتِ هتتبلي عليا؟! أنا بربيكي يا جليلة التربية!". قبل ما يلمس السرير، الدكتور وقف في وشه بصلابة، وفي نفس اللحظة دخل اتنين من أمن المستشفى مسكوا محمود من كتافه وثبتوه. محمود كان بيعافر وبيصرخ: "سيبوني! دي بنتي وأنا حر فيها! دي عيلة مجنونة وأمها معقدة! هوديكم في داهية كلكوا!". الدكتور بص للممرضة وقال بصوت صارم: "اتصلي بالشرطة فوراً، وبلغي نياية الطفل.. حالة اعتداء جسدي وجسيم على قاصر، وتستر على حالة طبية حارجة".أنا كنت واقفة في الزاوية، ركبي مش شايلاني. الموقف كان أكبر من قدرتي على الاستيعاب. بنتي كانت بتعيط بحرقة وهي ماسكة بطنها، محمود بيتقبض عليه قُدامي، والدكاترة بيجروا بالسرير عشان يدخلوا مريم العمليات. لما السرير اتحرك بسرعة في الممر، جريت وراهم وأنا مسكة إيد مريم. صوابعها الصغيرة كانت تلج، بس كانت ضاغطة على إيدي بأقصى قوة عندها. مريم بصتلي وعيونها مليانة دموع وقالت: "سامحيني يا ماما.. والله كنت عاوزة أقولك، بس هو كان يهددني بيكي.. كان يقولي لو حكيتي لأمك هطردها في الشارع ومن غير مليم، وأنا عارفة إنك مالكيش حد بعد تيتة ما ماتت.. كنت خايفة عليكي منه". الكلمات دي قطعت قلبي حتت. أنا اللي كان المفروض أحميها.. أنا اللي كنت ببلع الإهانة وسوء المعاملة وأقول "عشان البيت يمشي وعشان خاطر مريم"، طلع سكوتي وخوفي هما اللي فتحوا الباب للوحش ده إنه يأذي بنتي! قلت لها وأنا ببكي وببوس إيدها: "أنا اللي آسفة يا مريم.. حقك عليا يا نور عيني.. وحياة كل لحظة وجع شفتيها، ما حدش هيلمس شعرة منك تاني.. أدخلي العملية يا حبيبتي وكوني قوية، أنا مستنياكي برة ومش هتحرك". دخلت مريم أوضة العمليات، والباب المقفول كان بيعزلني عن البنت الوحيدة اللي حيلتي في الدنيا. قعدت على الأرض برة الأوضة، ضهرى للمبنى البارد، وعقلي بيعيد كل شريط حياتنا. تذكرت كل مرة مريم كانت بتيجي تقعد جنبي ساكتة.. كل مرة كانت بتقولي "ماما، هو بابا ليه علطول زعلان منا؟".. كل مرة كنت بأفوت فيها نوبة غضبه وأقول "معلش يا مريم، بابا مضغوط في شغل الشركة". . طلع الشغل والشركة كذبة، طلع عايش حياة تانية في خفاء من ورايا، مراهنات وديون وعنف. بعد نص ساعة، جه مأمور الضبط من قسم الشرطة ومعاه ظابط مباحث. قعدوا معايا في الصالة. كنت بحكي وأنا جسمي كله بيموت من الرعب والكسوف من نفسي. حكيت لهم عن التلات أيام اللي فاتوا، عن رفضه نجيب دكتور، عن الفلوس اللي كنت بشيلها خفية، وعن كلام مريم قبل ما تدخل العمليات. الظابط بصلي بهدوء وقال: "يا مدام، الموبايل بتاع البنت الدكتور سلمهولنا.. الملاحظات الصوتية اللي عليه فيها تسجيلات واضحة وصريحة وصوت محمود وهو بيهددها وبيضربها، وفيها اعتراف منه بإنه بيسحب فلوس من وراكي.. بنتك كانت أذكى وأشجع منك، كانت بتوثق كل حاجة عشان تحمي نفسها وتثبت حقيقته لما يجي الوقت". الجملة دي هزتني من الجوا. بنتي ذات الـ15 سنة كانت بتحارب لوحدها في الخفاء، وأنا الكبيرة الراشدة كنت غميت عيني عن الحقيقة عشان خايفة من المواجهة! عدت ساعتين كأنهم سنتين. خرج الدكتور من أوضة العمليات، وهو بينزع الكمامة عن وشه. جريت عليه: "خير يا دكتور؟ مريم عاملة إيه؟". ابتسم الدكتور ابتسامة هادية وقال: "الحمد لله، لحقناها في آخر لحظة.. الزايدة كانت ملتهبة جداً وعلى وشك الانفجار، بس العملية تمت بنجاح، وقمنا بتنظيف التجمع الدموي والانسجة.. هي دلوقتي في غرفة الإفاقة وخلال ساعة هتنقل لغرفة عادية.. وتقارير الطب الشرعي بالنسبة للكدمات اتكتبت وأرفقت مع ملف القضية". وقع جسمي على الكرسي وأنا بتنفس لأول مرة من تلات أيام. دموع الارتياح اختلطت بدموع الندم. بعد ساعتين، كانت مريم في الأوضة، المحاليل متوصلة بأيديها، ووشها بدأ يرجع له شوية لون بعد ما كان أصفر زي الليمونة. قعدت جنبها ومسكت إيدها. فتحت عينيها بالراحة وبصتلي: "ماما.. بابا فين؟". قلت لها بثبات لأول مرة في حياتي: "بابا في المقر الصحيح ليه يا مريم.. في القسم، والبوليس قبض عليه، ومش هيقدر يقرب منك ولا مني تاني أبداً.. الحق خد مجراه، وأنا معاكي ومش هسيبك تاني لحظة واحدة". مريم ابتسمت ابتسامة خفيفة، وغمضت عينيها براحة كأنها أول مرة تنام من غير خوف. النيابة استدعتني تاني يوم عشان أقول أقوالي الرسمية. محمود كان قاعد في الكلبشات، وشه أسود ومعفر، كبر عشر سنين في ليلة واحدة. لما شافني، حاول يبصلي بنظرة التهديد القديمة وقال بصوت واطي: "أنتِ هتخربي بيتك بيدك؟ فاكرة إنك هتقدري تعيشي من غيري أنتِ وبنتك؟ مالكيش حد، وهتشهدي زور قصاد النيابة عشان تشوهي صورتي؟". وقفت قدامه بصلابة عمرها ما كانت عندي، وبصيت في عينيه مباشرة: "أنت اللي خربت البيت يوم ما حطيت إيدك على بنتك.. البيت اللي يتبنى على الخوف والضرب مش بيت، ده سجن. . وأنا ومريم خرجنا من السجن ده خلاص.. والشهادة اللي هقولها جوة هي الحقيقة كاملة، ومش هسيبك لحد ما تاخد جزاء كل نقطة دم مريم نزلتها أو كل دمعة نزلت من عينيها". دخلت وكيل النيابة وقدمت كل الأدلة.. التسجيلات الصوتية، تقرير المستشفى، تقرير الطب الشرعي عن الكدمات، وشهدت برفضه علاجها وإهماله العمدي اللي كان هيؤدي لوفاتها. محمود حاول ينكر، وقال إن الموبايل متفبرك وإن الأم والبنت متفقين عليه بسبب خلافات زوجية، بس تقرير الطب الشرعي والتسجيلات الموثقة بتاريخ ووقت معين قطعوا عليه كل طرق الهروب. وكيل النيابة أمر بحبسه أربعة أيام على ذمة التحقيق مع التجديد، وتحويل القضية لمحكمة الجنايات بتهمة الضرب والاعتداء على قاصر والإهمال العمدي المؤدي للخطر. خلال الأيام اللي بعد كده، مريم بدأت تتعافى جسدياً ونفسياً. خرجنا من المستشفى ورجعنا البيت.. البيت اللي كان بيمثل لينا مكان مرعب.أول حاجة عملتها إني لميت كل هدوم محمود ومقتنياته وحطيتها في شنط ورميتها في المخزن، غيرت كوالين الشقة كلها، وفتحت الشبابيك عشان الهوا النظيف يدخل، الريحة الكتمة اللي كانت مالية البيت اختفت. اكتشفت بعد مراجعة الأوراق إن محمود كان بيراهن على مواقع إلكترونية، وشارب ديون طائلة، وكان ناوي يبيع الشقة اللي أحنا قاعدين فيها بعقد مزور من ورايا. الخيانة كانت متكاملة، بس ربنا أنقذنا في الوقت المناسب عن طريق الوجع اللي حسيت بيه مريم. رفعت قضية طلاق للضرر، وقضية اسقاط حضانة وولاية حظر معاملة. المحامي بتاعي قال إن ملف القضية قوي جداً، ومفيش أي أمل لمحمود إنه يخرج براءة أو يرجع يتحكم في حياة مريم. بعد ست شهور..كنا قاعدين في الصالة، الشمس كانت داخلة من الشباك ومغرقانا دفا. مريم كانت قاعدة على السفيرة وبتذاكر، وشها أبيض وردي، ضحكتها رجعت تاني تملا البيت. مريم بصتلي وقالت: "ماما.. أنا كتبت مقال للمجلة بتاعة المدرسة عن الشجاعة.. حكيت فيه عن البنت اللي كانت خايفة من الضل، لحد ما اكتشفت إن الضل مالوش وجود لما بنولع النور". قربت منها وبست رأسها وقلت لها: "أنتِ اللي ولعتِ النور يا مريم.. أنتِ اللي أنقذتينا إحنا الاتنين". في اليوم ده، صدر الحكم النهائي على محمود بالسجن المشدد خمس سنوات، وحكم الطلاق بات ومستقر. لما خرجنا من باب المحكمة، مسكت إيد مريم وقفت في الشمس. الهواء كان نقي، وما كانش فيه أي خوف مسيطر علينا. لأول مرة من سنين طويلة، حسيت إننا بنتنفس بجد، إن البيت بقي بيت، وإن مريم أخيرًا آمنة. تمت. روايات_مشيره_محمد

مقالات ذات صلة

نغم كانت واقفه

اماني السيد

زياره امي حكايات زهره

تزوجت أمرأة

بيت مهجور

جوزي الفقير حكايات زهره

اترك تعليقاً إلغاء الرد